2006-09-18T06:03:00.000-07:00

ANG MGA MAMBABATAS

Hindi maikakaila na ang ating mga "kinatawan" o representatives sa mababang kapulungan (House of Representatives) at ang ating mga senador ay maiimpluwensiyang mga opisyal ng ating pamahalaan. Ang katotohanang ito ay hindi talaga nakakapagtaka o nakakagulat. Nalalaman ng isang magsasaka sa kanayunan kung anong uri or "class" nabibilang ang hinalal niyang kinatawan. Maaaring ito na rin ay dahil na rin na halos sa iisang uri lang naman nanggagaling ang ating mga pulitiko. Base na rin sa mga nagdaang mga pag-aaral sa pinanggalingang uri ng mga miyembro ng kongreso, ang mga mambabatas ay kadalasan nanggagaling lamang sa pili at eksklusibong bahagi ng ating lipunan. Ano ba ang katangian ng ating mga mambabatas?

Sa unang bahagi pa lamang ng kasaysayan ng lehislatura ng Pilipinas, maliwanag na ang mga "kinatawan" ng bayang Pilipino ay nanggaling sa eksklusibong bahagi ng ating lipunan, kung saan hindi kabilang ang mga manggagawa, mga magsasaka at iba pang mga sektor na halos wala ng boses sa pamahalaan. Sa pag-aaral nga na isinagawa ni James LeRoy sa katangian ng mga miyembro ng "Malolos Congress" at ng "Philippine Assembly", makikita ang dominasyon ng mga mayayamang Pilipino sa pulitika ng Pilipinas. Sa pagtatatag ng mga Amerikano ng pamahalaang sibil sa Pilipinas, sinuguro talaga ng mga imperyalista na ang mga elitistang pulitiko ang mapupwesto sa lehislatura upang masiguro na ang interes ng Amerika ang mamamayani sa mga polisiyang ipapatupad sa Pilipinas. Gayundin, kapag dumating ang panahong idedeklara na ang paglaya ng Pilipinas mula sa Estados Unidos, mapapanatili pa rin ang kontrol ng Amerika sa ekonomiya at ugnayang panlabas ng ating bansa.

Sa pagkakatatag ng Senado at ng House of Representatives, hindi pa rin nagbago ang katotohanang ang lehislatura ng Pilipinas ay binubuo ng mga mayayamang pulitiko. Ang katotohanang ito ay pinatunayan ng pag-aaral ng Philippine Center for Inverstigative Journalism (PCIJ) sa katangian ng mga miyembro ng kasalukuyang kongreso ng Pilipinas. Tila halos pareho ang nakita ni James LeRoy at ng PCIJ sa katagian ng mga miyembro ng ating lehislatura. Sa kasalukuyan, karamihan sa mga miyembro ng ating lehislatura ay mga mayayaman, mga nanggaling sa mga pamilya ng mga pulitiko (Osmeña, Escudero, Cojuanco, Aquino, Arroyo, Romualdez, Marcos, Villafuerte, Estrada, Remulla at marami pang iba), mga nagmamay-ari ng mga malalawak na lupain, mga negosyante at mga kabilang sa pinagpalang sektor ng ating lipunan.

Ano ang implikasyon ng pamamayani ng mga elitistang pulitiko sa ating lehislatura?

Ang mga batas na ipinapasa ng mambabatas ay yaong mga may idudulot na kabutihan sa kanilang mga interes. Ipinapasa lamang nila ang mga batas na hindi sasalungat sa kanilang kabuhayan at katayuan sa pulitika. Mahilig din magpasa ang ating mga kongresista ng mga batas na may silbi lamang sa kanilang mga distrito. Paano na tuloy maitataguyod ang pambansang interes ng sambayanan kung iisang sektor lamang ang nakikinabang sa mga batas na nanggagagling sa ating kongreso.

Kaya nga hindi nakakapagtaka na ang repormang agraryo sa ating bansa ay hindi halos maipatupad. Ito ay sapagkat marami sa ating mga kongresista ay nanggaling sa mga pamilyang nagmamay-ari ng malalawak na hacienda. Ang batas sa repormang agraryo ay napakaraming butas na sinandya talagang gawin ng mga kongresista upang maprotektahan ang kanilang mga lupain na nagsisilbing pundasyon ng kanilang makinaryang pampulitika, marahil ay pamilyar naman sa atin ang patron-client system at ang implikasyon nito sa lokal at nasyonal na pulitika.

Isa pa sa marahil na implikasyon ng pamamayani ng mga elitista sa ating lehislatura ay ang pagkawala ng ideyolohiya sa mga partido pulitikal ng ating bansa. Pare-pareho lang naman kasi silang binubuo ng mga mayayamang pulitiko. Pansariling interes lamang ang sinusunod ng mga miyembro ng mga malalaking partidong. Kaya nga ang isang mambabatas ay miyembro ng oposisyon ngayon ngunit bukas ay nasa panig na siya ng administrasyon.

Para sa mga Pilipino, siguro ay nararapat lamang na isipin natin mabuti ang mga hinahalal natin sa ating kongreso. Napakahalaga ng trabaho ng isang mambabatas. Ang mga batas na ginagawa nila ay may epekto sa ating pamumuhay, sa ating kinabukasan at sa kinabukasan ng ating nasyon. Kung mananatiling ganito ang ating lehislatura, kailan pa maitataguyod ang pambansang interes na matagal ng ibinaon sa kailaliman ng ating kasaysayan. Sa aspeto pa lang ng pulitika, tunay nga na kinakailangan pa na gisingin ang ating pambansang kamalayan.

Chronicles of a Nationalist Scholar